PARA SA AKING AMA
7:41 pm / 7/14/15
leahlynduquillatomas
Ama, pangarap ay akin na pong nakamit
Ngunit sa’king dibdib ay may kaunting hinanakit
Sapagkat tagumpay ko’y di mo man lang nasilip
Mula nang ang iyong mga mata ay tuluyang maidlip.
Laksa-laksang pagsubok ay aking binata
Habang pinapahid ang pagdaloy ngmga luha
Kasabay ng pagdaranas ng mga hirap
Na kung buhay ka’y hindi ko malalasap
Marami akong nais gawin kasama ka
Mamasyal sa Baguio o di kaya’y Maynila.
Ang kasabay kang kumain kahit sa karinderya
Ikaw, si ina at mga kapatid ko ay sadyang mahalaga,
Kabutihan mo po sa’kin ay di ko lilimutin
Pagmamahal mo’y lagi kong nanamnamin
At mga payo mo po sa tuwina’y aalalahanin
Dahil yun na lang ang tangi mong pabaon sa’kin
Pagmamahal ko po sa inyo ni ina ay di magbabago
Dalawin man ako ng maraming alalahanin at bagyo
Sa tuwina’y aalalayan ang mga kapatid ko
Iyan ang natatanging pangako ko sa inyo.
Kailanman ay hindi ko tatanungin ang Dios
Kung bakit kinailangan maging ulila kaming lubos
Dahil hindi Niya hinayaang kami’y mamalimos
Malubog sa ilog ng kabiguan dahil sa malakas na unos.
Darating din ang panahon na muli tayong magkikita.
Mahahagkan, mayayakap at muling makakasama
Ikaw, ako at si ina ay muli masisilayang masaya
Sa panibagong daigdig na walang lumbay at payapa.
Walang komento:
Mag-post ng isang Komento